Eyþór Ingi og Babies flokkurinn heiðra Þursaflokkinn

Í tilefni 40 ára útgáfu plötunnar “Gæti eins verið” ætla Eyþór Ingi & Babies flokkurinn að halda tónleika laugardaginn 4. Febrúar á Græna hattinum þar sem platan verður leikin í heild sinni og hver veit að nokkur önnur Þursalög fái að fljóta með.

Hinn íslenski Þursaflokkur kom fyrst saman í febrúar 1978 og starfaði óslitið til 1982. Á þeim árum gáfu þeir út 3 breiðskífur, Hinn íslenzki Þursaflokkur (1978), Þursabit (1979), Gæti eins verið (1982) og eina tónleikaplötu, Á hljómleikum (1980). Árið 2008 gáfu þeir svo út plötu með lögum sem höfði ekki heyrst áður, Ókomin forneskja, sem og tónleika plötu, Í höllinni á þorra.
Þursaflokkurinn voru þeir Ásgeir Óskarsson, Egill Ólafsson, Karl Sighvatsson, Tómas Magnús Tómasson, Rúnar Vilbergsson og Þórður Árnason.

Hljómsveitina skipa þeir:
Eyþór Ingi Gunnlaugsson: söngur
Elvar Bragi Kristjónsson: bassi
Ingimundur Guðmundsson: hljómborð
Ísak Örn Guðmundsson: gítar
Skúli Gíslason: slagverk